"A ESTRUTURA DA FP E OS CERTIFICADOS DE PROFESIONALIDADE"
Pese
a que farían falta moitas páxinas para falar dun tema tan extenso como é o da
Formación Profesional e as Cualificacións tentaremos incidir sobre os aspectos
que consideramos máis importantes.
Un
feito clave para o desenvolvemento da FP en España foi a promulgación da Lei 5/2002 de 19 de xuño, das
Cualificacións e a FP, a partir da cal se empeza a dar forma a un novo
sistema que busca a adecuación ao
contexto socioeconómico e ás necesidades do mercado de traballo, á vez que
favorece a formación ao longo da vida.
Así
pois, a FORMACIÓN PROFESIONAL está
integrada por 2 subsistemas: A FP INICIAL, que depende da Administración
educativa, e a FP PARA O EMPREGO,
que depende da Administración laboral.
Pero,
que é unha CUALIFICACIÓN profesional
e que sentido ten?
É
un estándar
oficial que recolle o conxunto de COMPETENCIAS (capacidades,
habilidades e actitudes necesarias para dar unha resposta correcta en cada
contexto, sexa laboral ou cotiá) requiridas para o correcto desempeño dun
posto de traballo ou ocupación e que poden ser adquiridas por medio da
formación ou da experiencia. Está integrada polo “saber”
(coñecementos), “saber facer” (habilidades), “saber ser” e “saber estar”
(actitudes).
Para
comprender a estrutura da FP temos que tomar como referencia dous instrumentos
clave: O CATÁLOGO NACIONAL DE CUALIFICACIÓNS PROFESIONAIS E O CATÁLOGO MODULAR DE FORMACIÓN, xa que estes constitúen a referencia e punto de partida para
a elaboración dos títulos de Formación Profesional e os Certificados de
Profesionalidade expedidos polas administracións educativa e laboral,
respectivamente.
O CNCP é concibido como un
elemento dinámico, que estrutura as cualificacións partindo das necesidades do
mercado de traballo e permite a adaptación continua da oferta formativa da FP a unha realidade
cambiante como o é o sistema produtivo.
As
cualificacións están organizadas en FAMILIAS PROFESIONAIS en
función de criterios
sectoriais e funcionais e en áreas que inclúen ámbitos profesionais e de
actividade económica afíns. Á súa vez, existen 5 NIVEIS DE CUALIFICACIÓN, que dependen da competencia profesional requirida e que varía segundo
o grao de coñecementos, iniciativa,
autonomía, e complexidade da actividade a desenvolver.
As
cualificacións profesionais organízanse en UNIDADES DE COMPETENCIA (UC), que constitúen o agregado mínimo de competencias profesionais
susceptible de recoñecemento e acreditación parcial. A formación asociada ás mesmas está integrada por MÓDULOS FORMATIVOS.
Tendo en conta o comentado ata o momento queda clara a necesidade de interrelación entre a administración
laboral e a educativa, xa que é o único xeito de que a educación se
desenvolva segundo as esixencias do mercado de traballo.
De todos modos, dado o carácter complexo da formación profesional, a interrelación
entre os subsistemas non sempre foi do máis acertada.
No ámbito educativo, o vaivén de leis promulgadas nos últimos anos tampouco
contribúe a estabilizar o panorama, aínda que todas traten de resolver os
mesmos problemas: elevadas taxas de abandono escolar, atender ás esixencias do
novo espazo educativo europeo, desenvolver a competencia xeral correspondente á
cualificación ou cualificacións obxecto dos estudos realizados, comprender a
organización e as características do sector produtivo, os mecanismo de
inserción profesional, desenvolver unha identidade profesional motivadora de
futuros aprendizaxes e adaptacións ó cambio social e económico.
Na actualidade podemos sinalar dous cambios importantes: a
implantación da FP BÁSICA e a
ampliación da oferta de Formación Dual.
Aínda
que vén sendo unha nova versión dos PCPI (e dos antigos PGS) pódese destacar o
feito de que o título de FP básica dará
acceso directo a ciclos de Grao Medio, terá
os mesmos efectos laborais que o título da ESO e proporcionará unha cualificación profesional de nivel 1. Con
todo, trátase dunha medida exclusiva para persoas que estaban dentro do sistema
educativo e que foi posta en marcha de xeito apresurado (Cabe destacar que a
oferta de FP básica saíu publicada a mediados de agosto de 2014 para iniciarse
no curso 2014-2015)
Pola
súa parte a FORMACION DUAL, pretende
a formación en alternancia de actividade laboral nunha empresa con actividade
formativa e a formación recibida no marco do sistema educativo ou da FP para o
emprego. Isto dá a oportunidade de
adquirir experiencia á vez que formación, a través dun contrato de
formación e aprendizaxe ou dunha bolsa, feito que pode motivar ao alumnado á
vez que podería proveer ás empresas de persoal cualificado e adaptado ás
necesidades particulares de cada sector en cada momento.
Dentro da FP para o emprego hai que facer unha mención especial aos certificados
de profesionalidade:
Segundo o RD 34/2008 modificado polo RD 1675/2010 o CERTIFICADO DE PROFESIONALIDADE é unha acreditación oficial das cualificacións
profesionais do catálogo, con independencia de como se teñan adquirido: a
través da vía formativa, do recoñecemento da experiencia profesional
e aprendizaxes non formais, ou ben, pola vía
mixta.
O seu obxectivo é impulsar
entre as persoas traballadoras, tanto ocupadas como desempregadas, unha formación
que contribúa á actualización permanente
das competencias e cualificacións profesionais ao longo de toda a vida,
conxugando as necesidades de persoas traballadoras, empresas e sectores
produtivos.
Neste sentido temos que referirnos ao PROCESO
DE ACREDITACIÓN DAS COMPETENCIAS ADQUIRIDAS POR MEDIO DA EXPERIENCIA LABORAL E
VÍAS NON FORMAIS DE FORMACIÓN, xa que abre a posibilidade de que persoas que no
seu momento non puideron acceder polas circunstancias que foran, a unha
formación axeitada, poidan acreditar as competencias que posúen.
Este procedemento, convocado de forma anual polas administracións educativa e laboral, permite que as persoas con experiencia e sen titulación, pero que posúen as competencias profesionais requiridas para o desempeño dunha ocupación ou posto de traballo podan acreditar as unidades de competencia que logo lles van permitir acceder a un certificado de profesionalidade ou a un título de FP (neste caso, realizando formación complementaria).
Neste sentido a misión do persoal orientador será de gran importancia, xa que a información non chega do mesmo xeito a todas as persoas e moitas delas necesitan dun asesoramento exhaustivo, aínda para os trámites máis básicos. O proceso non é sinxelo.
Con todo, resulta cando menos curioso que despois da longa crise
económica que padecemos, moitas das especialidades formativas impartidas, por
exemplo, nos Talleres de Emprego, correspondan a cualificacións cun baixo nivel
de inserción laboral (ex: albanelaría, carpintaría, etc.)
Por que a Administración subvenciona programas baseándose na
Estratexia Europea 2020 e demais normativa de aplicación española, para unha
mellor inserción laboral de persoas desempregadas, formándoos precisamente en
ocupacións que presentan unha alta taxa de paro e sen moito futuro por diante?
En moitas ocasións o que falla non é a idea de fondo, senón a súa
aplicación práctica.
O NOSO STORIFY
https://storify.com/lolifontenla/certificados-de-profesionalidad
Juan Mario Araujo Vilar
Miguel Ángel Fernandéz Gómez
María Dolores Fontenla Redondo
Alejandra Mourelos Palacios
Carolina Pampín Pérez
O NOSO STORIFY
https://storify.com/lolifontenla/certificados-de-profesionalidad
Juan Mario Araujo Vilar
Miguel Ángel Fernandéz Gómez
María Dolores Fontenla Redondo
Alejandra Mourelos Palacios
Carolina Pampín Pérez
No hay comentarios:
Publicar un comentario